Chi nu lavura nu fa l'amur - Piz Blaisch Lunga da Sass Majur

Üna gita da bellezza e da cundiziun.

Minch'on n'haja pensà "mo, ingüna vöglia da surnottar aint illa Jamtalhütte per far Piz Blaisch Lunga". Massa dalönch, massa modern, massa char, massa blera glieud. Guardond sülla carta da gitas da skis Tumasch manajeva: "Mo, Piz Blaisch Lunga vezz'amo oura ter flot". E la n'haja gnü l'idea da chaminar da Val Tasna aint. Sco fingià fat pro Piz Fenga. I sarà hard ma sgür ün bun training da cundiziun.

Lura: No eschan partits  a las 7:00 dal plazza da parcar pro la punt sur dal Tasnan tanter Ftan ed Ardez - eir cuntschaint suot il nom Sass Majur. Svelt sur la via forestala fin Alp d'Urezzas ingio cha no eschan gnüts aint ils prüms raz da sulai. Ün perfect lö per far marenda. Davo aint in Val d'Urezzas fin al fuond lura vaja stip amunt vers nord. Pro P. 2525 i's po dovrar il spi chi maina direct sül Vadret d'Urezzas. I's chamina a l'ur nord dal vadret fin sülla sella P. 2994. Davo üna pitschna skiada cun pels gio fin la morena d'immez aint il Vadret da Chalaus chi vegn gio dalla Fuorcla da Chalaus. Superar quella e skiar gio darcheu e muntar cun üna bella storta gronda fin pro la sella tanter 3230 e 3224. Depot dals skis e leif sur dal spi sün piz. La muntada düra circa 6-7h.

Inavo sülla listessa via. Trar sü'ls pels güst avant la morena a muntar fin pro'l punct P. 2994. Davo nun esa plü necessari da trar sü'ls pels darcheu. I's fa'l bain da nu perder massa blera otezza düront la skiada our dal Val d'Urezzas schi's nu n'ha vöglia da chaminar bler. La skiada our dal Tasna es sco adüna ün schaschin, ma i va sainza trar sü'ls pels.

La gita es lunga. Circa 7h da muntada. La schmuntada dovra eir amo üna tera purziun d'energia: Trar sü pels, far üna cuntra-muntada fin P. 2994 e skiar our dal Val Tasna fa insembel eir amo 3h.

Gita insembel cun Tumasch.