Signal dal Signalhorn

Vairamaing vaina planisà da far Piz Fliana, ma il vent zoffleva fingià düront la not ter ferm. Uschea d'eira fingià cler cha'l bulletin da la bunura rapportarà ün privel da lavinas "considerabel" eir scha la saira i d'eira amo "moderà". Quai as confermeva cur cha no eschan chaminats aint in Val Tuoi. Tuot la via d'eira boffada aint fermischem. No eschan gnüts da Sent cul auto che cha ün char vaschin ha imprastà a no. No vain tut la plazza da parcar "secret" pro'l hotel Meisser. Davo duos uras vaina baivü ün cafè aint illa chamonna Tuoi. Tuot ils tudais-chs e inglais levan star illa chamonna, ma no vain let la prognosa dal meteo e uschea i d'eira cler cha almain ün zich sulai ans allegrara. Lura vaina tut la costa plü stipa dal di suot nossas assas: Per furtüna la costa dalla chamonna Tuoi fin Plan Rai es frequentà ter ferm uschea il privel es amo tolerabel. Davo Plan Rai fin Plan Mezdi e lura finalmaing sur dalla Cudera fin al pè dal spi süd-west dal Signalhorn - ün per meters suot il Silvrettapass. Depot dals skis. Lura leif sür crap e naiv fin al spi culminant lura sur da quel fin cha'l punct plü ot es ragiunt. L'ultima passascha es ter exposta. I's fa bain da tour il zappin cun sai. S-charpellas nu fan dabsögn scha la naiv es in uorden ma pon güdar.

Güst sün piz il tschêl as driviva. Wow che dramatic. Eu n'ha dis sco hoz plü gugent sco'ls dis clers. Nö be blau, alb, grisch, nair bain assorti. Dis sco hoz masdüglian tuot quai inandret.

Lura üna bella skiada inavo. Gita cun Asti. Grazcha fichun a W. per l'auto.