CAS-EB: Egghorn - Vadret Tiatscha - Lavinuoz

Il müdamaint dal clima renda pussibel rutas chi nu d'eiran pussibel amo avant ün per ons. Üna da quistas füss la schmuntada da la Cudera gio Val Laviuoz, perquai cha la ruptura dal Vadret Tiatscha d'eira quasi vertical. Ma cul s-chodamaint dalla temperatura mezdana eir quist vadret ha pers volumen ed es gnü plü cuort uschea cha la ruptura nun es plü direct. Precis quista nouva ruta d'eira il böt da nossa secziun alla fin d'eivna dal 13 e 14 marz.

No eschan partits cun las pendicularas la bunura. Düront la muntada sülla sella tanter Piz Minschun e Piz Oscar e la skiada seguainta fin Alp Valmala gnivan accumpagnats dalla RTR per ün report da üna lunghezza dad üna minuta e mez sur dalla sqürezza dürant gitas in reguard allas lavinas. Quai ha dürà üna tera pezza. Mo bain. Il böt dal di d'eira la Chamonna Tuoi. Düront la muntada vers La Furcletta pro üna otezza da circa 2450m ans vaina separats in duos gruppas: Üna chi va direct sur dalla Furcletta aint in Chamonna Tuoi ed nossa chi leiva far amo ün pa training da cundiziun da plü. No eschan muntats vers nord passond Urrezzas Cuortas fin al pè dal Hinterer Jamspitz. Il temp manchaiva per rampignar amo sün piz ma quai füss stat sowieso be alch per ils dombraders dals piz - Hinterer Jamspitz is po adüna far, quai nu cuorra davent. Bain. Lura skiada gio fin Chammonna Tuoi, tschaina, buna not!

Culaziun vaina gnü a las ses e mez, davo partenza. Il böt dal di d'eira'l Silvrettahorn ma fingià dürant la muntada vers Plan Rain Duri ha tschüff problems cun sias pels - i d'eira simplamaing massa fraid e zoffleva da gnir nar. Lura Not ha svelt decis cha'l Silvrettahorn sarà "cancellato". Metter sü las pels duos jadas füss stat la catastrofa per ün per da no. Per furtüna ha'l decis cha'l rimplazzamaint sarà'l Egghorn. Far il Signalhorn duos jadas infra ün mais füss stat schon ün pa lungurus. A las desch eschna stats sün piz. L'idea da skiar gio'l paraid süd nun pudeiva gnir realisada perquai cha la naiv d'eira ter ruotta e üna fuada vess consequenzas terriblas. Uschea stuveivna halt schmuntar regularmaing. Davo skiada gio la Cudera. La vaina trat aint ils sezzins per suar gio il rest dalla ruptura chi'd es amo restà. Cun ün pa precauziun quai füss i eir sainza sua. Davo üna lunga skiada fin Lavin. La tura vaina conclüs cun baiver cafe e birinas aint il bisto dalla staziun.