Bergtürli Isentaler Scheidegg

Sonne tanken hoch über dem Nebel und hoch über dem Urnersee

Da mir uf äm Mundartwäg unterwäx gsi sind, probier ich dä Text im Isitàuer-Dialäkt zschribe.

Hitä häts mau was Lockeres selle si. Das isch eppä ai em Gschmack vo mim ehemalige Arbetskolleg Rouf gsi. So simmer gmietli uf de teerete Strass vom Isitàu Dorf i d Bärchi usegloffä. Leider isch üssert Näfu nit z gseh xi, immerhin hät iws aber e frindlich Frai gseit, mer chänd im Gifi Platz näh. So hänts iws dur de Näfu a d Sunne ufägseilet. –  hämmer gmeint… D’ Sunne hät am nini nu gschune, da uf de Ober Bärchi, hät der Puir gseit…jetzt halt nimme -  er hät aber versicheret, das es ab em Ritteli sicher sunnig si wird…
Ja, so isch es ai gsi! Härrlich, so üs em Näfumeer üsztige, me fielt sich da wie frisch badet und die ganz Bärgwält um iws ume hät iws mit emene strahlende Lache begriesst.
Dr Wäg obsi uf d Scheidegg isch güet kännzeichnet und so simmer dänn scho bald s erscht mal bi Chäs und Brot a de Sunne ghocket.
Vis à vis hät iws de scheenscht Bärg griässt, bitz witers weschtlich de scheenschti Chrizbärg. Und susch nur Stilli und Rueh, eifach herrlich!
Uffe und appä isch äs dänn zum hechschte Punkt vo der Scheidegg gange. Aber hit hämmer ditlich meh Paise statt Schritt gmacht. Mir händ ja ai nid miessä pressiere, dänn mir hänt ja gseh, dass dr Näfu bitz benäblet isch und immer meh ufgstige isch. So isch er bis üf 1300 gstige, mir sint aber üf 1400 gsi.
Eppä am Eis hämmer iws dänn üf dä Wäg gmacht appe uf d Furggele. Dr Näfu isch dicht gsi, aber mir hänt de Wägg guät gfunde und so hämmer iws dänn bim Hof chenne firs appefahre mit dem Gifi amäldä. Scheen, dass mich de Bsitzer nachdem ich ihn schon jahrelang nimme gseh ha grad erchännt hät.
Mit em Bähndli dur de dicki Näfu simmer dänn bi de Talstation acho. Händ grad nu bitz miässä uifpasse dass mer vo der Puirä det nit mit Gillä agspritzt worde sind.

Vo Isitàu Posch isch äs dänn wieder zrugg uf Ziiri gange.

Rouf, beschtä Dank fir diä agnähmi Begleitig.

NB:
Bähndli Ober Bärchi choschtet 6, Bähdli Furggelä 7 Franke.
De Bus is Isitàu fahrt unter dä Wuche all Stund, was firne Service!