Mutschen 2122 m

9.9.08: Brülisau - Mutschen

s'Wetter isch einfach perfekt!

Vo Brülisau durchs Brüeltobel. Plattenbödli und Sämtisersee zur Bollenwees.

"Chönd wädli, wädli, wädli..."   Schelleschwinge und Chueglocke gebimmel...  d'Senne hend alli Händ voll z'tue zom s'Vech i de Spur zbhalte.

Es schiint, s'Directmarketing uf de Alp isch beendet för die Saison... schad. 

De Buur meint, da sönd jetzt die Letschte im Abtrieb vo de Alp... Firoobig...  und scho rennt er de Galtlig no - .

Gott sei Dank, häts no öppe e Beiz unterwegs. I dä Bollewees en erste Znüni.  Noch de churze Rast, am Fälensee entlang ufe zur Häderen. Nomoll en Abschnitt obsi zom Zwinglipass. Eisenhut, Edelweiss und Steinbrech..  immer wieder schön zom Luege...

Z'mittag uf em Zwinglipass mit em Altmann im Rugge... genial...

So, jetzt aber witer, über de Chreialpfirst zom Mutschesattel und ufe uf de Gipfel.
Isch das en Usicht und erst en Tüüfblick... Geographie-Wüsse isch g'frogät...

So, jetzt, abwärts, e paar Meter über de Schnee, d'Frauemänteli und es Feld voll vo dem wohl giftige Eisenhut.. zur Roslenalp.

Rechts, d'Chrüzberg mit unzählige, chalchige Kletterspure und links die interessant Formation im Roslen-/ bzw. Saxerfirst.

E paar Meter bis zom Abstieg zur Saxer Lugge. Nomoll 1/2 Stond zur Bollenwees, wo s'Bier denn au scho wartet.

Denn, rechter Hand, via Alp Soll und Ruhsitz, und de "Chnükiller" abwärts noch Brülisau.

Es hätt sich recht zogge, aber wahrlich g'lohnt.

So, jetzt han I för das Johr mis Alpstein Rondom komplett.

       Doch, de Herbst isch no jung.