Piz Tavrü 3168m

I's vezza il piz Tavrü da blers oters pizs impustüt schi's va da Scuol aint in S-charl. Sia flanca dal nord, tras la quala va la ruta normala, es fich impreschiunanta. La flanca dal süd es aint in üna part dal parc naziunal, ingio chi nun es permiss da chaminar. Las rutas süllas craistas sun fich greivas e pervi da quai gnan fattas d'inrar. Eir scha l'apparentscha da quist piz es superbgia nun es el muntà bleras jadas. Eu nu n'ha chattà ün unic rapport da gita aint il internet. Aint illa guida dal CAS esa scrit "stantus" (mühsam) che chi nu quadra seguond mia opiniun.

Eu n'ha gnü l'idea per üna ascensiun cur ch'eu sun stat sül piz Vallatscha cun Martin Pernet. E las fotografias ch'eu n'ha fat da là e dal piz San Jon Dadaint m'han güdadas fich a planisar quista gita.


Partenza da S-charl a las 18:30. No vain fat ün Biwak na dalöntsch da P. 2382 davovart aint illa val Tavrü.

La bunura no eschan partits a las 6. Lura vaina muntats las gravas fin la entrada dal culuar da l'ost da P. 2692. Montascha da las s-charpellas. Lura i's munta ün pa (120 m da otezza) fin ch'ün oter culuar cumainza a la dretta (direcziun vest). Quist oter culuar guida sün üna sella trenta meters (otezza) suot il piz. Il rest es üna bella rampignada aint il II. o III. grà. Schmuntada aint ils listess stizis.

I's sto far attenziun perquai ch'il grip es sfessglià. Il meglder temp es dürant ils prüms mais da la stà cur ch'id es amo naiv aint ils culuars.

Equipamaint: Sua, tschinta, chaplina (aint ils culuars esa privel da bouda), s-charpellas.

Gita cun Asti.